გამოქცეული, ბიჭად გადაცმული წყნეთელი გლეხის გოგო მაია გზად ტყვეებით მოვაჭრე თავადს გადაეყრება. უშიშრად შეუტევს, ტყვეებს გაათავისუფლებს და მოღალატე თავადს მეფე ერეკლეს მიგვრის. მათე-ბიჭად მონათლული მაია ყმების გაყიდვაში ამხელს თავადებს, რომლებიც შეთქმულებას მოუწყობენ და დილეგში გამოამწყვდევენ. მათეს ბერიკებად გადაცმული მეგობრები გაათავისუფლებენ და შემოსეული მტრის წინააღმდეგ მებრძოლ მეფის ჯარს შეუერთდებიან. დაჭრილი მათე-მაია თავისი ქალობის საიდუმლოს უახლოეს მეგობარ ვაჟს მხოლოდ სიკვდილის წინ გაუმხელს.

ცნობილი მთამსვლელები, და-ძმა სიმონ და ალექსანდრა ლომიძეები თეთნულდის დალაშქვრისას ჩამოწოლილ ზვავში მოყვებიან. სიმონს და მის მეგობარს ზვავი უფსკრულში ჩაიტანს. სიმონის უმცროს ძმას, ალიოშას, დაღუპულის დღიურის ჩანაწერები თეთნულდის დაპყრობის სურვილს აღუძრავს. ალიოშა, რომელსაც ალპინიზმი არასდროს იტაცებდა, მთამსვლელი გახდება. ერთმანეთს მოსდევს ექსპედიციები უშბის, შხელდის და სხვა მწვერვალების დასაპყრობად. გადაღებაში მონაწილეობენ ალპინისტები: მ. ანუფრიკოვი, ი. არკინი, გ. ახვლედიანი, გ. გულბანი, გ. დებერლი, პ. ხაზაროვი, ი. ლაპშენიკოვი, ი. ნემსიწვერიძე, ვ. მუხინი, გ. ხუციშვილი